Dje n’mëngjes postieri
Ka sjellë një letër,
Bardhit prej Misirit
Ia shkruan mikja e vjetër.
E thjeshtë është adresa,
Shkruar me pendë t’hollë:
— Bardhit n’Katund t’Ri,
Më të mirit në shkollë.
Dallëndyshja e vogël
Letrën e dërgon,
Që n’shtëpi të Bardhit
Për çdo vjet banon.
Bardh, më mori malli,
Te ti mendja m’shkon;
A po mëson në shkollë
Si e ke zakon?
Si është në atë anë koha,
A ka rënë shumë borë?
A ke më shpesh librin
Apo sejat në dorë?
Këtu në Misir dimri
Është si atje n’verë;
Na përzhiti dielli,
Shira bien rrallherë.
Ma ruaj, o Bardh, çerdhen,
Mos t’mbushet me borë,
Ose mos ta prishë
Me thonj ndonjë sorrë.