I
Në lulishte të mbushuna me erë,
Sa janë t’ambla’ shetitjet n’verë;
Fryn veriu i freskët, bilbili këndon,
Zan’ i ambël me gzim zemrën na e gzon!
Andaj, eja ti moj verë,
Sikur erdhe vitet tjerë,
Plot me lule, plot me erë!
II
S’ka si zani i bilbilit,
Kur fillon me i këndue
Burbuqes së trandafilit,
Që ka nis me u zbukurue!
Andaj, eja ti, moj verë,
Sikur erdhe vitet tjerë,
Plot me lule, plot me erë!
III
Qingji hudhet në bar të njom’ me gas
Edhe deles s’vet i shkon pas;
Vjen bariu mbas tufës, fyeli tingëllon,
Zogu kangën e vet në lis e fillon!
Eja, moj e bardha verë,
Sikur erdhe vitet tjerë,
Plot me lule, plot me erë!
IV
Shifni lulet, zymylat,
Manushaqet kur lulzojnë,
Me gas në zemër, bylbylat
Gojartë, rreth tyne fluturojnë.
Eja, moj e bardha verë,
Sikur erdhe vitet tjerë,
Plot me lule, plot me erë!