Letërsi on Gjuha Jonë

Bleta

Thu, 02 Jul 2026 00:00:00 +0000

Sa len dielli çohet bleta.
Lule m’lule tuj kërkue,
Tuj flutrue me krah t’lehta,
Shkon derdh mjaltin mu në zgjue.
Bletën, çuna ta shikoni,
Ditë për ditë që të mësoni.

Dëshirat e kafshëve

Thu, 02 Jul 2026 00:00:00 +0000

Macja bante: mjau-mjau-mjau,
Me thonj minin ç’e përlau,
Lopa pallte: mu-mu-mu,
Viçin tim sa fort e due!
Blegrin delja: be-be-be.
Qingjin tim a mos e pe?
Rosa bante: mak-mak-mak,
Mu në uj’ do zhytem pak!
Lifte qeni: ham-ham-ham,
Asnji kockë të ha s’kam.
Hingllin pela: hi-hi-hi,
Se kërkon të hajë tagji.
Bërtet pata: ga-ga-ga
Thërret bibat ku i ka.
Qan dhe zogu: cui, ciu-ci,
Kur i sulet ndo ‘i huti!

Dielli

Thu, 02 Jul 2026 00:00:00 +0000

Shkëlqen qielli,
Se leu dielli.
Si kalorës
Ky gjithë botës
Tue shëtitë
I jep dritë.

Sa len dielli,
Qeshet qielli:
Pemët ngrohen,
Lulet zgjohen,
Gjithë krijesat
Ngjallin shpresat.

Porsi rrota
Sillet bota
Sa nji gogël
Shum’ e vogël
Edhe rreth
Diellit bredh.

Dikur

Thu, 02 Jul 2026 00:00:00 +0000

Nga bolliku, ngrania tepër,
Velesh beu dhe zotnia;
Kurse në ‘i kasolle t’vjetër
Vuente nana nga uria!

Disa hajshin gjellë me shije,
Se kusia u rri ke vargu,
Kurse tjerët tretë urie,
Ndjejshin erën për së largu.

— Bukë, moj nanë! — bërtiste fëmia.
Edhe turresh në dollap.
Qante nana nga idhnia:
— Aman, bir, se s’kam ç’të jap!

Nga dëshprimi sa nuk plasi,
Kur i biri zu t’kërkojë
Nji kafshatë me i gjethe prasi
Për ta shtimë në herë në gojë!

Ditë e bukur

Thu, 02 Jul 2026 00:00:00 +0000

Herë në një këmbë
herë në tjetër
vashëza kërcen
porsi një kitër.

Lulet n’lulishte
te fontanë e re
ia shkelin shoqja — shoqes
syrin gjithë hare …

Nuk kërcen vashëza
si zogëz e lehtë
por hidhet ëndrra
e dashur për jetë …

I valviten flokët
e mëndafshtë prej dritës,
ato nuk janë fjolla
po flamujt e rritës …

Ditë vjeshte

Thu, 02 Jul 2026 00:00:00 +0000

Lindi mëngjesi me buzëqeshje t’lehtë,
Dielli ndriçoi gjethet në ar praruar,
Mandej fshehu sytë dhe treti nën retë,
Që bredhin qiellit si qengja të bekuar.

Shpejt u mrrol qielli dhe u errësua,
Ia nisi vajit me pika të mëdha loti;
Pastroi rrugët, pemët, pullazin e pluhruar,
Përsëri doli dielli nga gjumi i zgjuar.

Në majë të bjeshkës u shfaq bukurosh ylberi,
Doli i farkuar me më të bukurat ngjyra;
Shpejt treti pas malit, humbi si sheqeri,
Përsëri nd’rroi pamjen e vjeshtës natyra.

Ditën që hyri prilli

Thu, 02 Jul 2026 00:00:00 +0000

Ditën që hyri prilli,
Zuri e këndoi bilbili;
O bilbil, o zog i parë,
Fjala jote s’ka të sharë.
Këndo, o bilbil, këndo,
Në na zëntë gjumi, na zgjo.

Djali dhe xixëllja

Thu, 02 Jul 2026 00:00:00 +0000

Në nji mbramje ‘i dajl’ i vogël, po kthehesh në shtëpi,
Shef nji xixëllojë, që ndriste rrazës gardhit mbi një vi;
Me të shpejtë shkoi e nxuerr, se iu dhims e fort e donte
Por e shkreta xixëllojë ishte lagë e nuk fluturonte!
Atëherë djal’ i vogël në shtëpi të ‘ij na e çoi,
E pranë zjarrit, kur e ngrofi, ajo zu t’fluturojë;
Mbasandaj ngadalë i tha: „lumthi ti o djalë i mirë!”

Djali e grethi

Thu, 02 Jul 2026 00:00:00 +0000

Nji djalë pa në ‘i mur të naltë
Brimën, ku hyni grethi;
Mbushi grushtin me baltë
Dhe i suell sa e rrëqethi.

Grethi u zemrue
Dhe menjiherë u vërsul
Djalin për ta pickue
E thumbin e helmatisun me ja ngul.
Po këtë herë djali shpëtoi
Tue hudhë paltonin sipër krejtë,
Dhe grethi rrugën e dredhoi
E hyni në brimën me të shpejtë.
— O greth i keq, — tha djali, nuk të la
Të dalish ma prej andej,
Shpejt brimën e murit do ta za!
Dhe filloi t’i sjell me plisa të mëdhej,

Dheu

Thu, 02 Jul 2026 00:00:00 +0000

Dheu i gjatë e i gjerë
Na ep bukë e na ep verë,
Për të ngrënë e për të pirë,
Kush di ta punojë mirë.

Si një njeri i shtrënguar,
Dheu nuk falë gjë kurrë;
Pa munduar, pa punuar
S’na ep as misër as grurë.

Do ta punojë njeriu
Dhe ta vadijë me djersë,
Që të hajë bukë i ziu,
Nga uria të mos vdesë.

Punoni, more të mjerë,
Se dhe gjëri ne na mbetë,
Pas neve vijë të tjerë,
Nuk soset kjo jetë.

Era

Thu, 02 Jul 2026 00:00:00 +0000

Un’ jam era,
Që vij shpesh-hera.
Unë fryj në pyll
Dhe zani s’më pushon,
Por gjithnji gjëmon!

Nganjëherë egërsohem
E s’mund të ndalohem:
Thyej ‘dyert e shtëpi
Dhe nuk ju la në qetsi.

Erdh pranvera

Thu, 02 Jul 2026 00:00:00 +0000

Erdh pranvera, erdh pranvera!
Në kopshtie, fusha e ferra!
Manushaqja paska çel
Dhe zymbyli sapo del.
La la la la la la la
La la la la la la la!

Çeli gonxhet trandafili,
Po ligj’ron me gzim bilbili.
Këndojn’ fmija përnjiherë:
— Mirë se erdhe, moj pranverë!
La la la la la la la
La la la la la la la!

— Mirë se erdhe dallandyshe,
Ti lejlek dhe ti, moj qyqe;
Thonia t’ju ndigjoj nji herë;
— Mirë se erdhe, moj pranverë!
La la la la la la la
La la la la la la la!

Erdhi dimni

Thu, 02 Jul 2026 00:00:00 +0000

Zbardhi bor’ e re
Tokën porsi ve;
Struken zogjt’ në çerdhe,
Leprat nëpër gjerdhe.

Pam-pum shtie gjuetari,
Zari lef kaf-kif;
Ciu-ciu po qan zogu
Në gardh se mërdhif!

Vuu-vuu ban furtuna,
Uuu-uuu mblidhen ujqit,
Pam-pam pret sopata.
Puf-puf kërcet zjarri!

Vap e vup godasin
M’topa bore fmija.
Disa vëzzz rrëshqasin
N’akull mu ke vija!

Shpjegime: zari — zagari, qen gjahu.

Fëmija prekës

Thu, 02 Jul 2026 00:00:00 +0000

Kush me dorë diçka përket
Ashtë i mbrapshtë e ashtë i zi,
Askush s’do me e pasun ngiet,
Kush ta shohë atij i merr mëni.

Fshati im

Thu, 02 Jul 2026 00:00:00 +0000

Lark, lark, atje në jug,
Si borë e bardhë për herë,
Je fshehur, fshati im,
Në mes t’pyllit të blerë.

Agimi, me fresk t’dritës,
Kur n’sy t’çdokujt shkelqen,
Prej lindje diell’i bukur
Ty rreze t’arta t’bjen.

Skaj teje si argjendi
Shumë gurra të kalojnë;
Mbi ty çdo nate t’kaltër
Me mijëra yj të vetojnë.

E sa herë vie pranvera,
Ty zogjt’ t’këndojnë lavdi;
Kopshtiet e tua t’verës
Skuqen për mrekulli.

Fytyrëqeshur

Thu, 02 Jul 2026 00:00:00 +0000

Mirë se erdhët
n’kopshtin tim,
ku si lulet
çupëzat rriten,
ku vocrrakët
gjejnë arg’tim,
ku dhe flutrat
vijnë mahniten.
Trëndafile
të gjithë jemi,
ngjyra, ngjyra
i bëjmë parqet,
shokë e shoqe
këtu plot kemi
n’vend të zogjvet
cicërrojnë vargjet.

Guxo

Thu, 02 Jul 2026 00:00:00 +0000

Lundërtar, që s’rrezikohet
Kur është deti shkumbë e valë,
Vetë me vete mos t’ankohet
Se i shkoi dita pa fitim.

Duke u tallur e duke prituar
Asgjë send nuk qitet n’dritë;
Çfarëdo sendi për t’fituar
Trimëri lypset dhe guxim.

Gjyshja plakë

Thu, 02 Jul 2026 00:00:00 +0000

Vitet janë shuar,
shpina fuqi s’ka;
Vitet kanë rënduar,
gjyshja shumë ka ra.

Por prap’ ajo don
këngë edhe mahi;
Përore përralla ka
të tregojë për fëmi'.

Fëmija kur e takon
i falet me gëzim;
Buzagaz i thotë:
„U rriç, pëllumbi im!”

Në hije të shtogut
ulen në një vend,
Përrallat më të reja
dalin rend e rend.

Prej rrezeve t’diellit
shtogu kundërmon;
Gëzojnë gjithë fëmija,
gëzon dhe gjyshja gëzon.

Hana

Thu, 02 Jul 2026 00:00:00 +0000

Po del hana bukuroshe
Rrumbulluem an’ e kand;
Brigje m’brigje, qoshe m’qoshe
Derdhet drita si argjand!

Rrumbullake porsi nuse
Fytyr’ plotë na ndriçon,
Han’ e re si lule fushe
Len e ndrit e perëndon!

Hyri pranvera në klasë

Thu, 02 Jul 2026 00:00:00 +0000

Shend e verë, mësuesja u qas,
Nxënësit gjithë buzagaz.
„Paska hyrë pranvera n’klasë!”

Të gjithë lule kanë varë
Në qafë si gjerdan me ar,
Lum e lum për këtë behar!

Mësuesja tha: dil Venerë,
Shkruaje një fjali me vlerë:
— Jeta jonë është pranverë.

Kali i vogël

Thu, 02 Jul 2026 00:00:00 +0000

N’vogëli
Pata ‘i kalë,
Me zengji
E me shalë;
Fre e bishte
T’gjitha i kishte.

Qe nji kalë,
Kalë prej druni
E me shalë
Prej zibuni,
Kishte fre
Nji fije pe.

Hante, rrinte
Tok me mue
Edhe pinte
Uj në krue,
Pastaj dilshim
E shëtitshim,

Kal, i drujtë,
Sa të doja!
Sa t’kam ruejtë!
Sa t’shikoja!
Sa herë delja
Pas të merrja.

Kam nji qingj që më ha bar

Thu, 02 Jul 2026 00:00:00 +0000

Kam nji qingj që më ha bar,
Me nji zile në qaf var;
Kam nji qingj, nji larosh.
Që ma quejnë Bukurosh.

Giçi, Giçi plot me gas
Unë e ndjell ai m’vjen pas,
Be, be, be, blegërin
Vjen prapa e m’arrin.

III

E me brina dap e dap
Do t’më hedhë mu në trap,
Por s’më hedh se më ka shok,
Prandaj shkojmë të dy tok.

Kënga e Erenikut

Thu, 02 Jul 2026 00:00:00 +0000

Gjarpëron Ereniku,
këngën s’e ndal dot;
zër’ i tij i vjetër
është i ri dhe sot.

Me vale qumështore
ecën dhe s’pushon;
fusha dhe bregore
stolisë e freskon.

Ata verra, shelnje,
veshur shtatit ti’,
pasqyrohen lumit
me gurë si inxhi.

Përreth me livadhe,
kopshtije dukate;
djersa e fshatarit
me groshë e patate.

Ai bar i kositur
në stogje me sanë,
kundërmon hap’sirës
erë t’livadhit tanë.

Kënga e punës

Thu, 02 Jul 2026 00:00:00 +0000

Ku dielli ulet n’male,
Kodrisha dhe sukore,
Jehon kënga e punës
Ndër aksione rinore.

Është gazi më i bukur,
Që kaplon tokën mbarë;
— Rini, me djersën tënde
Dhe shkrepin e bën arë.

Në ballë ti me tunele
E rrugë stolisur je;
Krahrorin ke lulishte,
Pemishte duart i ke.

Der’ n’yje kënga jote
Do t’ngjitet me furi,
Kur dijen, djersën tënde,
E derdh për vend, rini.

Kënga më e bukur

Thu, 02 Jul 2026 00:00:00 +0000

Eja, një fyell në hije
Në kopshtie psherëtin,
Ajo kënga më e qetë
Është kënga e barinjve.

Era lind e kundërmuar
Që nga gjir’i trëndafilit,
Ajo këngë më e gëzuar
Është kënga e bilbilit.

Mendjen mos e vra i shkretë,
Haj! T’ia themi djalerisë,
Kënga m’e bukur në jetë
Është këngë e dashurisë.

Këngë maji

Thu, 02 Jul 2026 00:00:00 +0000

Erdhi maji,
maji i bukur;
këngë e punës
shkon jehonë.

Ndër fabrika
dhe punishte
festë maji,
festa jonë.

Flamur i kuq
porsi flaka
valon, valon
shumë krenar.

Gëzon pun’tori,
mbarë rinia,
çdo pionier
dhe fshatar.

Këngët e mia

Thu, 02 Jul 2026 00:00:00 +0000

Si çdokush mjeshtrinë e vet
E dua këngën time;
Për shumë gjëra t’mira m’flet,
Më mbush plot gëzime.

Këndoj për nënën që m’ka rritur
Dhe më ka këshilluar;
Këndoj për sytë e saj të ndritur,
Që më kanë gazmuar.

Këndoj për motra e vëllazërinë,
Pranverën, agimin;
Këndoj për shkollën, diturinë,
Këndoj për mbarë njer’zimin.

Si bilbili çerdhen e vet,
Këndoj vendlindjen time;
Këndoj për punën që na pret
N’jetën e përtrime.

Kitra

Thu, 02 Jul 2026 00:00:00 +0000

Mbi një dru arre,
Në zgavër t’vet,
Kitra jetonte
Me fëmijë t’vet.

Arra, lajthia
Mblidhte çdo ditë
Pa zbardhur drita,
Deri n’mesditë.

Tërë verën kitra
Fare s’pushon
E mandej dimrit
Vetëm pushon.

Ku gjendet vendlindja ime

Thu, 02 Jul 2026 00:00:00 +0000

Te ura,
te përroi,
te laura,
te kroi,
te thana,
te sana,
te nëna,
në katund
me dashurinë
e pafund,
në buzëqeshje,
në ëndërr,
në zhgandërr,
në përqafime
e —
në kujtimë
është vendlindja ime

Kukulla ime

Thu, 02 Jul 2026 00:00:00 +0000

Mblodha shkopin me nji sukull
Dhe kështu e bana kukull.
Porsi nuse bukuroshe
Dhe e vuna në nji qoshe.

Emnin se ç’ja vuna Tanë,
E ndërrova me fustan
Plot me lule rreze ar
Edhe rruzat n’qafë i var.

Me gjithë shpirt e fort e due,
Fjalë të bukura kuvendoj;
Her’ e puth e ledhatoj,
Se dhe kuklla më do mue.

— Lamtumir’ tash kuklla ime,
Lamtumirë moj faqe-mollë,
Se m’erdh koha për mësime,
Se m’erdh koha për në shkollë.

Lejleku dhe zogjt' e tij

Thu, 02 Jul 2026 00:00:00 +0000

Buzës ujit te ‘i kënetë
Ishte nji kasoll’ e shkretë;
Në çatin’ e saj vjet
Ngrefi çerdhen nji lejlek.

Ky na kishte veç tre zogj,
Që kërkojshin t’hanë nga ‘i çikë;
Por kasollja na u dogj
Dhe vu çerdhen në rrezik!

Nisën zogjt’ me brit’, me qa,
Kur çatia zu të marri;
Erdh lejleku, por ç’me pa?!
Hudhet shpejt t’i nxjerr’ nga zjarri!

Flaka çerdhen e rrethoi,
Shum’ lejleku u përpoq,
Shtrini fletët i mbuloi:
Me zogjt’ bashkë shkrum e dogj!

Letra e dallëndyshes

Thu, 02 Jul 2026 00:00:00 +0000

Dje n’mëngjes postieri
Ka sjellë një letër,
Bardhit prej Misirit
Ia shkruan mikja e vjetër.

E thjeshtë është adresa,
Shkruar me pendë t’hollë:
— Bardhit n’Katund t’Ri,
Më të mirit në shkollë.

Dallëndyshja e vogël
Letrën e dërgon,
Që n’shtëpi të Bardhit
Për çdo vjet banon.

Bardh, më mori malli,
Te ti mendja m’shkon;
A po mëson në shkollë
Si e ke zakon?

Si është në atë anë koha,
A ka rënë shumë borë?
A ke më shpesh librin
Apo sejat në dorë?

Lisi me katër kate

Thu, 02 Jul 2026 00:00:00 +0000

Një lis me katër kate
Kish plaku ynë në fshat;
Mbi të kish vënë kafaze
Dhe kurthën aty ngat.

Një ditë i bëri frute
Lisi i tij me gogla
Tridhjetë këmisha cube,
Dyzetë këpucë të vogla.

U gëzua, u gëzua, u gëzua
Plaku ynë në fshat;
Tha: „Këto më mjaftojnë mua
Kur t’rriten edhe pak”.

Në mëngjës shkoi për t’parë,
Me lot iu lagën sytë:
Rrobat i kishin marrë
Do fëmijë t’klasës së dytë.

Lumi

Thu, 02 Jul 2026 00:00:00 +0000

Sa gëzim ka lumi
mbushur me fëmij’;
si peshq të lazd’ruar
mbi valët e tij.

Nga kupa e qiellit
dielli nxen shum’,
fytyrat e bardha,
që lahen në lum.

Mbi vala të lumit
kaltër si qielli,
luajnë të gëzuar
në rreze dielli.

Si peshq e pata
notojnë pa u ndalë,
e buzët e lumit
rrahen valë, valë.

Macja ime

Thu, 02 Jul 2026 00:00:00 +0000

Sa herë macja ime
Me pulla bojë hine
Më bisht rri ke votra,
Posa shtrohet sofra.

Ditën rri pranë hinit,
Po natën kërkon;
I vjen përqark minit
Dhe e qapërlon.

Sa me lehtësi
Ecën e mban vesh,
Të zajë ndonji mi,
Ndonjë kokë-lesh.

Dy sy si kandila,
Dy sy si thëngjilla,
Flaka shkrepëtime,
I ka macja ime.

Mbasi ha e ha,
Mbahet si tru-thatë,
Kinse nuk e pa
Macja këtë natë,
Por sa ban nji hap,
I mjeri u kap…

Manushaqes

Thu, 02 Jul 2026 00:00:00 +0000

Manushaq’ e vogël
Lulëzon në ferra,
Lajmëron tërë botën
Se erdhi pranvera.

Manushaq’ e vogël
Unë të dua shumë;
Mos e ul ti kokën,
Mos u tremb nga unë.

Manushaq’ e vogël,
Mos u dridh në ferrë;
S’vi për të këputur,
Vi të të marr erë.

Mëngjesi

Thu, 02 Jul 2026 00:00:00 +0000

Çka po thotë gjeli
Mbi maje gardhi?
— Zgjohu, Bal, zgjohu
Se dita zbardhi.

Çka po thotë zogu
Atje ndër lisa?
— Fëmijë, iku nata,
Këngës ia nisa.

Ç’thotë mullizeza
Zabelit n’shpat?
— Te gurra mbrrina
E para n’fshat.

Ç’thotë traktoristi
duke lëvruar?
— Po kohë e bukur
Për t’mbjella muar!

Mëngjezi në katundin tim

Thu, 02 Jul 2026 00:00:00 +0000

Lindi dielli, pun’ e mbarë!
Katundarët t’bashkuem sot,
Për të mbjellë sa ma shum tokë,
Që të gjithë janë në garë!

Ja sulmuesit mu në ballë:
Burra, gra, e vajza t’dlira
Populli ynë asht i gjallë,
Populli ynë ban çudira.

Ja, traktori me fuqi
Punon arat e bashkueme:
Futen ploret mu në gji
Të ksaj toke të çlirueme!

— Po pse bije vall’ kjo lodër?
— Pionerët për mësim
Po i pret me shum’ gëzim
Shkoll’ e re atje mbi kodër!

Mësuesit tem

Thu, 02 Jul 2026 00:00:00 +0000

O mësuesi em i dashun,
Me sa mall që të kujtoj,
Un’ në zemër kam me t’pasun,
Mirësin’ kurrë s’ta harroj.

Mendjen time ti e ndrite
Me mësim e dituni,
Ti si djalin tand më rrite,
Ti më bane t’jem njeri.

Disa herë më ka qëlluem,
Kur mësimet s’i mësoje
Që prej teje jam qërtuem,
Porse prap ti mue më doje.

….Sjell ndër mend, kur ti na thoje:

— „Hir” e mirësi në doni —
Me butsi na këshilloje,
„Shpejt, djema të mësoni!” —

Miku i vërtetë

Thu, 02 Jul 2026 00:00:00 +0000

Ndë zjarr zbukurohet ari,
Mik’i mirë është si zjarri,
Vërtet na qërton me gojë,
Të prapë kur të na shojë,
Po kur të kemi nevojë,
Me zemër do të kërkojë
Ndë rrezik të na shpëtojë.

Përkundër, një mik i lik
S’tregohet kurr besnik;
Dhe kur sillemi të marrë,
Na thotë si na vjen mbarë;
Dhe në rrezik kur takojmë,
S’na qaset dhe ta kërkojmë.

Miu

Thu, 02 Jul 2026 00:00:00 +0000

Miu me gëzim,
Porsa t’errësojë,
Për ndopak ushqim
Del që të kërkojë;
Për macen kujton,
Se nuk e dëgjon.

Pra, nëpër shtëpi,
Bredh me kujdesi,
Hyn nëpër hambarë,
Zbret nëpër qilarë,
Kështu çdo ushqim
E ha me trishtim!

Se çarku e pret,
Macja e përgjon:
Të mjerin ç’e gjet,
Se nuk din ku shkon!
Nuk mendon aspak
E pra, bi në lak!

Shpjegime: çarku — kurthi.

Mos thuaj rrena

Thu, 02 Jul 2026 00:00:00 +0000

Mos thuaj rrena kurr, o fëmi,
E gjithmonë t’i kesh n’mëni.
Një ndeshkim është fort më mirë
Se rrencak ndokush me t’thirrë.
Mos t’shkojë mendja se me rrena
Fajin tënd e fsheh përbrenda.
S’vonon dita, gjë s’e ndalë
E n’fushë rrena ka për t’dalë.
Por veç rrena ka për t’mbetur
E kund besë nuk ke për t’gjetur.
Edhe t’drejtën n’qoftë se e thua
Për rrencak kanë për t’kujtua.

Natën e mirë

Thu, 02 Jul 2026 00:00:00 +0000

Përkund gjumi botën tërë,
Vetëm deti s’di të flerë.

Mbi të digjet, bie një yll,
Gjumi syçkat vie m’i mbyll.

Vala lot e bredh e lirë.
— Valëzo! … Natën e mirë!

Në lirinë e pyllit

Thu, 02 Jul 2026 00:00:00 +0000

Në pyll gudulis era
Njeriu është i lirë:
— T’vrapojmë, o shokë, njëhera
Nën aha plot dëshirë.

Sa duam ne kem’ liri
Të këndojmë e të fhërrasim:
— Shfrani gëzimin fëmijë!
Kurrkush nuk do t’ju flasë.

Në pyll

Thu, 02 Jul 2026 00:00:00 +0000

Nën lisat e pyllit
Fullanza këndon;
Bariu i bije fyellit
E dhent i lëshon.
Gjithkush atje gëzohet
Kur zë fryn fullimi.
E trupi të ftohet
Tuj pimë ujë burimi

Shpjegime: fëllimi — erë e hollë, erë e lehtë.

Në vigjilien e Ditës së Republikës

Thu, 02 Jul 2026 00:00:00 +0000

Mbi qytet fluturuan
Fishekzaret dhe lulëzuan:
Të kuqe, të verdha, të blerta, të bardha …

Po, ç’dëshirojnë, ç’dëshirojnë
Këta yje të kuq, të blertë që xixëllojnë? …

I kuqi — t’gjithë njerëzit t’jetojnë n’liri,
I blerti — dielli t’na jep bukë e begati,
I bardhi — mes popujve t’ketë paqë,

Për të gjithë, të gjithë …
Dhe t’gjitha ngjyrat e tjera n’shpërthim
Janë dëshira t’ndritura t’atdheut tim.

Ngrihem heret në mëngjes

Thu, 02 Jul 2026 00:00:00 +0000

Ngrihem heret në mëngjes,
Laj duer e faqe mir’ e mirë,
Këndoj mësimet me kujdes,
Shkoj në shkollë me shum dëshirë

Shkoll’ e bukur, me kopshte t’gjana
Un’ të due si syt’ e mi.
Atje luej me shoqet t’tana
Me gëzim e dashuni

Shpjegime: due si syt’e mi — të due shumë.

Një shembëll i mirë

Thu, 02 Jul 2026 00:00:00 +0000

— Zog i mirë, i vogël jakë,
Të lutem të lozim pakë
Bashkë këtu në pëqi
Me të madhe dashuri.

— Çun i dashur, kam shumë punë,
Gjetkë e shkoj kohën unë;
Poshtë e lartë po fluturoj,
Që shtëpinë ta ndërtoj.

— Pës, pës, mace e mirë jakë,
Të thërras të lozim pakë,
Eja, dua të mësosh
Me dy këmbë të qëndrosh.

— Djalth i dashur, nuk prehem,
Me vall’ e me lodra s’rrehem,
Se shtëpinë dëshiroj
Nga gjithë minjt’ ta qëroj.

Peizazh Baçke

Thu, 02 Jul 2026 00:00:00 +0000

Mes stërnishtave: i asfaltit shkëlqim
është ngulur në verë.
Ca gra t’vetmuara n’kalim
dhe një plep me degët n’erë.

Nëpër heshtje, zbathur, udhës
cilido vogëlush hapëron.
Nga lart, nga qielli të duket
rri në vend, fare s’udhëton.

Penda — parmenda

Thu, 02 Jul 2026 00:00:00 +0000

Me mue shkruejnë përmbi letër
E peshojnë çdo fjalë e vepër.
Unë kam gjuh’ e nuk të rrej
Flas me njerëz të mëdhej

Gjuha ime flet për dije,
Ndan mendimet fije-fije
Vetëm unë nuk di të flej,
Të vërtetën sa ta gjej.

Mos u mburr kaq fort, moj pendë,
Se dhe unë jam nji parmendë.
Nuk e din se unë ngas arat?
Nuk e din se unë mbjell farat?
Nuk e din se punoj tokën?
Nuk e din se unë mbaj botën?
Nuk e din ti pa mue,
Nuk do t’ishte sikur thue?

Për gjah

Thu, 02 Jul 2026 00:00:00 +0000

Fyshekët për brezi
Dhe pushkën mbi krah,
Pa zbardhur mëngjezi
Të dalim për gjah.

O burra, bre shokë,
Rreth hapur të gjith’,
Vend zini mbi tokë
Lart malit më vith.

Thëllënza dhe rosa,
Dhi t’egra mjaft ka;
Arinj, derra, dosa,
Sorkadha si ka.

Nosita dhe shkurta,
Plot turtuj në gjeth,
Verdhashka të urta,
Kot plumbin s’e heth.

. . . . . . . . . .

Përtacja

Thu, 02 Jul 2026 00:00:00 +0000

Përtacja sa mund baret,
kurse fshisa i fshin vet'.

Përtacja rri — zemërgjëra!
Asaj vetë i qep gjilpëra.

Përtacja ulet e tallet,
Kurse stufa vetë i kallet.

Dhe sh’h, pa pritur, një gjeloc
N’tavë i gjuhet mish e koc.

Puplat pasi ka shpupluar,
Në feltere vetë është gjuar.

Kokën po mirë e ka ngritur
E përtaces i ka britur:

„Kikiriki! — Përtacule!
U poq mishi. Mule, mule!”

Përroi im

Thu, 02 Jul 2026 00:00:00 +0000

Me shkumë t’argjendtë
Ai përrua
Si mund të jetojë pa mua?

Unë i hipa trenit
Tash jetoj n’qytet,
Dorë për dore me lumin
Ai u nis për në det …

Lulëzova në fshat
Si lule n’vesë hareje
Kurse ai në një shpat
Shumë kohë para meje …

Dhepse larg njëri-tjetrit
Me valë t’argjendta
Shkojmë jetën
Ne kurrë nuk jemi vetëm …

Rrjedh, rrjedh ai përrua
E m’derdhet në kujtim
Suvalë e tij e artë
Është syri im …

Pranvera mbrrini

Thu, 02 Jul 2026 00:00:00 +0000

Dëbora na shkrini,
Na mbrrini pranvera,
Manushaqja mbini
Me gjithë lulet tjera.

Dallandysh’ e bukur
Çerdhen po ndërton,
Ma tutje nji flutur
Mbi lulet qëndron.

Bujku me gëzim
Arat i punon,
Deles me nxitim
Qingji pas i shkon!

Prindët

Thu, 02 Jul 2026 00:00:00 +0000

Dal prej shkolle shkoj n’shtëpi
Plot me shpres, e me gëzim,
Se atje gjej prindt e mij,
Babë e nanë të shpirtit tim.

I rrok n’qafët, i pushtoj,
Pse më rrisin me dashni,
Dhe më çuen që të mësoj,
Të fitoj unë dituni.

Pulat

Thu, 02 Jul 2026 00:00:00 +0000

Kur ecin pulat,
s’dëgjohen fare;
S’i trembet syri
çupës n’dritare.

S’friksohet zemra
e harabelit,
as s’ngriten dot
puplat e gjelit.

Hapat e pulës
po sa dëgjohen,
veshët e Bubit
menj’herë currohen.

Jo pse friksohet
nga ndonj’ armik,
por pse ai shpirtin
e ka besnik.

Puna

Thu, 02 Jul 2026 00:00:00 +0000

Mos rri! Puno ditë e nat’,
Sepse e shkurtë është kjo jetë;
Vendit thuri tjetër fat —
N’do t’jesh njeri i vërtetë.

Shiko yjet, veç vrapojnë,
Hëna pas diellit nuk ndalet;
E shtratit lumenjt’ shpejtojnë,
Prrocka vogël s’i ndal valet.

Me fuqinë e saj t’flutrimit
Shqiponja der’ n’diell zotëron;
Bleta e vogël n’lule t’prillit
Me krah’t e saja kërkon.

Mos rri! Puno ditë e nat'
Sepse e shkurtë është kjo jetë;
Vendit thuri tjetër fat,
N’do t’jesh njeri i vërtetë.

Qingji i vogël

Thu, 02 Jul 2026 00:00:00 +0000

Qingji plot me gas
Kullot nëpër bar,
Deles i shkon pas,
Turret si manar.

Oh, si blegërin!
Delja e kërkon,
Me gjuh’ lëpin,
E do, e fërkon!

Shpejt e merr në gji,
I jep qumësht taze;
Qingji si kërthi
Hovën e ban naze!

Ngado që të shkoj,
Nuk më ndahet hiç:
E due, e lëmoj,
E ndiell giç-giç-giç!

Shpjegime: qumësht taze — qumësht, tambël të freskët.

Rritu, djali im

Thu, 02 Jul 2026 00:00:00 +0000

Rritu, rritu, djali im,
Mali, fusha po bleron;
Rritu si rritet një trim,
Nëna, babai shumë të don.

Fusha fushën sa e don,
Mali lisin kur gjelbron,
Zogu ajrin kur fluron,
Po aq nëna të adhuron.

Skilja

Thu, 02 Jul 2026 00:00:00 +0000

Si tinzare
vjen nji skile
magjistare
kap me hile
nji këndes
në qymes.

Ku ta dinte
ky i shkretë,
se do t’binte
në lak vetë;
se përndryshe
s’do këndonte
edhe skilja
s’do e diktonte.

Zoja skile
lajkatare,
si bandille,
s’peshon fare
se ç’po heq
ky fatkeq!

Shpjegime: skile — dhelpër; këndes — gjel; bandille — çapkëne, që ka qejf të luajë e të tallet.

Skilja dhe gjeli

Thu, 02 Jul 2026 00:00:00 +0000

Prej pyllit na del
Nji skile si plakë;
Në lis shef një gjël.
— Zbrit, thotë, të rrim pakë!
Ah, ta dish sa dëshiroj
Zanin tand veç ta ndigjoj!

Skilja me kto fjalë
Qaset me ngadalë,
E mbërthen në fyt,
Gati po e mbyt:
Pastaj tallet: „He, mor gjel,
Ç’të ka zani që s’të del?”

Gjeli menjiherë
Fjalë me skilen nis:
— M’len të marr pak erë,

Po m’deshe për mish! —
Skilja rrehet, e lëshon;
Mirpo gjeli n’lis fluturon!

Suklla, suklla bie bora

Thu, 02 Jul 2026 00:00:00 +0000

Që nga mali era vjen,
Ftyr, e duer sa t’i mpin!
Suklla, suklla bora bjen,
Plaku n’votër po mbërdhin!

Lakuriq pemët kan’ mbetë,
Gjithë natyra n’gjum ka ra,
Përmbi gardh nji zog i shkretë
Ciu! Ciu! Ciu! filloi me qa!

Shpjegime: n’gjum ka ra — nuk ka fare gjallni në natyrë (s’ka gjelbërim, nuk ndëgjohet za zogjsh, mbretnon heshtje e plotë).

Sytë

Thu, 02 Jul 2026 00:00:00 +0000

Si yje nate n’qiell
Shkëlqejnë dy sytë e mi,
N’pranverë me lule e diell,
Plot jetë e plot gjallëri.

Si rrezja që lëshon dritë
Flakrojnë dy sytë e mi;
Me gëzim e shpresë që ndritë
Për popull tim n’liri.

Si rrush n’hardhi pa vjelë
Shkëlqejnë dy sytë e mi
Për punë që sytë na i çelë
Dhe na sjell lumturi.

Shkolla ime

Thu, 02 Jul 2026 00:00:00 +0000

Sa me qejf që shkoj
Unë në shkollën time.
Mësuesin e dëgjoj,
Kur na jep mësime.

Kur shkoj në shtëpi,
Mbushem me gëzime;
Mendja gjithnjë m’rri
Mu te shkolla ime.

Koha zu me u qasun
Shkolla po na th’rret,
Ecni, shokë të dashur,
Mësuesi po na pret.

Shtëpia ime

Thu, 02 Jul 2026 00:00:00 +0000

Atje në shtëpi
Kush më pret mue sot,
Jan, prindët e mij
Që më duen fort.

Sa gëzim që ndij,
Me vlla e me motër,
I lumtur kur rri
Pran’ zjarrit në votër!

Në çdo vend që kam me shkue,
Kush më pyet, do t’i kallzoj,
Se veç tjerash, kam mësue
Babë e nanë që të nderoj.

Të punojmë si ora

Thu, 02 Jul 2026 00:00:00 +0000

Tik-tak, tik-tak,
Bije ora pa pushim.
— Merrni, pionerë,
Librat me nxitim!

Tik-tak, tik-tak,
Ecën ora me nxitim.
— Erdhi koh’ e shkollës,
Shpejt, o biri im!

Tik-tak, tik-tak,
Ora s’ndalet asnji grim.
— Shpejt, o pionerë,
Në shkollë për mësim!

Të vrapojmë pas diellit

Thu, 02 Jul 2026 00:00:00 +0000

Ja dielli në livadh!
Nxitojmë!
Shiko!
Tapa, tupa, tapa, tupa.
U fsheh!
Ku?

U fsheh diku në ballkon!
Vrap pas tij! Shpejtësi!
Tapa, tupa, tapa, tupa!
Edhe këtu bën freski.

Ka ikur skaj parkut!
Në bankë!
Shiko!
Ejani pas tij!
Tapa, tupa!
Iku!
Ku?

Iku n’plazhin fare bosh!
Të vemi dhe ne!
Hidhemi n’ujë, nëpër të!
Tapa, tupa, tapa, tupa
N’ujë hidhemi nëpër të!

Toka jote

Thu, 02 Jul 2026 00:00:00 +0000

Sa gjëra me lule
shpirti yt që do,
në tokën gratçore,
shih, i gjen kudo.

Dashurinë e nënës,
t’ëmbël që në djep,
mos harro, oj njome,
vendi yt ta jep.

Lumenj, gurra, kroje,
fusha plot me fryt,
për lumturinë tënde
t’i jep vendi yt.

Fluturat si nuse,
lulet plot me erë,
vendi yt i bukur
i bie në pranverë.

Cicërimën e zogut,
jonet magjiplote,
me drithma dëshire
t’i jep toka jote.

Trëndafilat

Thu, 02 Jul 2026 00:00:00 +0000

Trëndafil i kuq,
Që del në oborr,
I kuq si flamuri,
Q’u ngrit në tetor.

Trëndafil i kuq,
Lulezë e nderit,
Si shami e kuqe
Gushës pionierit.

Trëndafil i bardhë,
Që çel në pranverë,
Si pëllumb i paqes
Je për pionierë.

Trëndafil i kuq,
Trendafil i bardhë,
Ditë e lumturisë
Neve na ka ardhë.

Thueja, moj gjinkallë!

Thu, 02 Jul 2026 00:00:00 +0000

Mbi degën e pemës
Gjinkalla këndon
Atë kangën e verës
Edhe nuk pushon…

Gruni po na piqet,
Djersa palë-palë;
Vera vapën pruni,
Thueja, moj gjinkallë!

Shpjegime: thueja — thueja kangës, këndo.

Vendi im

Thu, 02 Jul 2026 00:00:00 +0000

Sa pyje, male,
Fusha me lule,
Kroje t’argjendta
Ka vendi im!

Burra vigana,
Djem si petrita,
Gra, vasha t’bukra
Ka vendi im!

Si za bilbili,
Porsi valë deti
Vjen gjuha shqipe
E vendit tim.

Ku gjenden zanat?
Ku gjenden trimat?
Ku gjenden nënat
Si n’vendin tim?

Vendi im i Shtrenjtë

Thu, 02 Jul 2026 00:00:00 +0000

I bardhë është vendi im i bardhë
E lumenjt’ të shpejtë të argjendtë;
I kaltër është qielli im i kaltër
E lumenjt’ të shpejtë të argjendtë;
I kthejlltë është deti i kthjelltë
E lumenjtë të shpejtë të argjendtë;
Hirplotë është vendi im hirplotë
Me qiell të kaltër e të kthjelltë.

Vera

Thu, 02 Jul 2026 00:00:00 +0000

Në lulishte të mbushuna me erë,
Sa janë t’ambla’ shetitjet n’verë;
Fryn veriu i freskët, bilbili këndon,
Zan’ i ambël me gzim zemrën na e gzon!

Andaj, eja ti moj verë,
Sikur erdhe vitet tjerë,
Plot me lule, plot me erë!

S’ka si zani i bilbilit,
Kur fillon me i këndue
Burbuqes së trandafilit,
Që ka nis me u zbukurue!

Andaj, eja ti, moj verë,
Sikur erdhe vitet tjerë,
Plot me lule, plot me erë!

Vjersha me kapuç

Thu, 02 Jul 2026 00:00:00 +0000

Do viza të thyera,
Do t’tjera gërmuq;
O del gjë e bukur,
O shkon puna huq.

I shkathët është çuni
E rrallherë i ngathtë;
Për vepra të vlefshme
Shpesh na është i aftë.

S’i pyet përmendoret
Pse nuk flasin dot
Poashtu dhe bustat
Pse nuk derdhin lot.

Do viza të thyera,
Do t’tjera gërmuq;
Të gjitha së bashku
Një këndues të kuq.

Vjeshta

Thu, 02 Jul 2026 00:00:00 +0000

Çunat thërrasin me gëzim:
vjeshta, vjeshta!
U poq rrushi, e me nxitim
Shkojn’ ndër vneshta!

Qielli vrahet, pemët gjethet
Po i lëshojnë,
Dallandyshet i lanë çerdhet:
se ç’po shkojnë…

Vllaznit e motrat

Thu, 02 Jul 2026 00:00:00 +0000

Rreth e qark te votra
Me gëzim ne presim
Me vllazën e motra
Të lozim të qeshim.

Lum kush i ka,
Të luajë me to;
Motër e vëlla
Lum kush i do!

Xixëllonja e parë

Thu, 02 Jul 2026 00:00:00 +0000

Ja ku erdh pranvera,
Maji u afrue,
Nji mizë vjen nga dera
Tue xixëllue.

Rrugës, nëpër ara,
Natën kush kalon,
Ajo i del para:
Vendin ja ndriçon!

Xixëlonj’ e quejnë,
Asht e urt’ e mirë;
Turren fmijt’ e luejnë
Me të plot dëshirë.

— Sa nji rruzë je,
Po dhe ti punon:
Me dritzën që ke
Sa fort më gëzon!

Shpjegime: rruzë — kokën e vogël qelqi.

Yjet

Thu, 02 Jul 2026 00:00:00 +0000

Porsi xixa po dallojnë
në hapsinë,
Të gjithë yjet, që ndriçojnë
gjithësinë.
N’atë qiell pa mbarim
syri im
Vështron yjet pa numrim
plot ndriçim!
Natën në qiellin e lamun,
pa nji re,
Han’ e yje ç’i kam pamun
me hare!

Shpjegime: hare — gëzim, gaz.

Ylli i vogël lart në qiell

Thu, 02 Jul 2026 00:00:00 +0000

Ylli i vogël lart në qiell
Duket porsi zjarr në pyll;
Sipër dheut lart qëndron,
Xixa, xixa xixëllon.

Disku i diellit kur perëndon,
Nata hijen e lëshon,
Ylli veten e zbulon,
Xixa, xixa xixëllon.

Dritë e yllit kur shkëlqen,
Udhëtarit q’i pëlqen;
Natën errët kur po shkon,
Udhën vetëm s’e harron.

Natën çuni kur shikon
Sipër botës fort mendon;
Mend’e tija ç’i habiti,
Yll’i vogël se si ndriti.

Zbukurimi i botës

Thu, 02 Jul 2026 00:00:00 +0000

N’shuplakën e bujkut, n’mëngjes
dielli ra — botën përqafoi,
bimë e re — ra dhe shpresë
nga ajo lulja gufoi.

N’mesditë fletët e blerta
bujkun e freskuan;
ndërsa lulet e shqerta
mollëkuqet i zbukuruan.

Eja mollëkuqe e mirë,
tha lulja, vallen ta nisim;
bashkë me djersën e dlirë
të bujkut — botën t’stolisim.

Zemra e qëruar

Thu, 02 Jul 2026 00:00:00 +0000

Zemëra që është e qëruar,
Kurdoherë është e gëzuar.
Mos jij me dy faqe kurrë,
Jij i drejtë, i mirë e burrë.

Për çdo gjë që ke dëshirë,
Mos pandeh se është e mirë.
Mos lërë punën për pastaj,
Çdo kohë ka punën e saj.

Kur të jesh i zemëruar,
Mendja është e turbulluar,
Bëj durim sa të kullohet
Se njeriu pastaj pendohet.

Zogu dhe djali

Thu, 02 Jul 2026 00:00:00 +0000

Një zog të bukur zuri një djalë,
Ay po dridhej dhe i thosh ca fjalë:
— Nuk të vjen keq që jam i mitur
Si ti i vogël e s’jam dhe rritur?
Jam bir i vetëm e mëma më pret,
E kam lënë keq brenda në foletë,
Ah! Kjo kohë e keqe këtu më pruri
E gracka jote ra e më zuri,
Më pret im mëzë si ty jot ëmë,
Të mos i vete, ç’bënëtë prëmë?
Të zezthit ne! Përse na ngini?
Në punët tonë përse s’na lini?
Kam dhe unë shpirt dhe dua të rroj,
Të leçij, të bredh, të loz, të këndoj,
Unë që s’kam mend, si thotë njeriu,
Kujt i bëra keq? Ç’bëra unë i ziu?
Përse më bën rob? Nga mua ç’do ti?
Fjalët e zogut djali i dëgjoi,
Qau edhe e puthi, mandej e lëshoi.

Zogu i vogël fle

Thu, 02 Jul 2026 00:00:00 +0000

Oj erë, lum era
fryj më ngadal’,
se zogu i vogël
po flen në mal.

Ai nesër heret
ka për t’u zgjuar
në fusha, male
për t’cicëruar.

Oj erë, lum era,
fryj më ngadal'
se zogu i vogël
po flen në mal.

Zogjtë e vendlindjes

Thu, 02 Jul 2026 00:00:00 +0000

Nëpër shtigje jete
m’uruat udhë të mbarë
ju mora me vete
m’cicëroni n’damarë …

Në t’larmet gusha
m’ruani përjetimet
me flatra mbi fusha
m’shfletoni kujtimet…

N’katund sa herë kthej
ju derdh në korije
m’ndihmoni të gjej
lule poezie!

Djepin me cicërime
ma keni zbukuruar
t’shkruaj me përjetime
heret m’keni mësuar.

Nëpër shtigje e caqe
ngrohtë m’ledhatoni
me pupla, t’miat vargje
ju mund t’i firmoni …

Zonja e livadheve

Thu, 02 Jul 2026 00:00:00 +0000

N’livadh del e vogla bletë,
N’gjethe t’njoma ajo ulet,
Në mesditë kur bëhet nxehtë,
Me buzë t’vogla i puth lulet.

Aguliqja me pesë fletë,
Më e bukra lule n’fushë,
Me gjithë gaz e përshëndet:
— Mirë se erdhe, oj bletushë!

Shkon te vjollca e vetmuar,
Rrugës ndalet dhe n’behar,
S’mendon fare për t’pushuar,
Der’ sa t’ngopet me nektar.

Thonë se krahët i ka t’artë,
Thonë se fëmijët i do pa masë,
Prandaj n’hoje kur bën mjaltë,
Mund të ngihet krejt një klasë.

Abetare

Sat, 09 Jun 2018 00:00:00 +0000

Are, are, abetare,
Në çdo faqe një dritare,
Po më çel ti për çdo ditë,
E më jep gëzim e dritë.

Ore, ore, oj fletore,
Ca me vija, ca katrore.
Do t’ju shkruaj me vija të lira,
Do t’ju mbush me nota të mira.
nota të mira.

Bajrami

Sat, 09 Jun 2018 00:00:00 +0000

Aroma e Bajramit, tingëllima e ezanit,
depërton thellë dhe shpon zemrën e muslimanit,
mbretëron gëzimi e hareja
ne të gjithëve na bashkon feja.

Festën e Bajramit të gjithëve ua uroj
posaqerisht vëllezërve e motrave,
selam ju dergoj,
në rrugë të dëlire Allahu na udhëzoftë,
xheneti stacioni i fundit për ne qoftë.

(huazuar nga kjo faqe)">kjo faqe)

Bota e Tërë

Sat, 09 Jun 2018 00:00:00 +0000

Bota e tërë munt të të shajnë,
Po pej ty kurrë s’mund të më ndajnë;
Se tinë je dhe dot’ jesh vetë
Që dua unë në këtë jetë.

Edhe në qoftë të vdeç më parë,
Pej tynë kurrë s’jam për të ndarë,
Por si të gjallë që të kam pasur,
Edhe të vdekur kam për të dashur.

Nga vari yt do mos largohem,
Nat’ edhe ditë gjer të bashkohem,
Edh’ atje lart ku s’ka mëri
S’munt të na ndanjë as një njeri. as një njeri.

Fati

Sat, 09 Jun 2018 00:00:00 +0000

Prej mëmës më ke mërguar,
Fat’ i zi edhe mallkuar,
Në vënt t’huaj që të rronj,
Mëmëdhen’ ta dëshëronj.

Nga të dashurit më ndave,
Shpirtin zemrënë m’i dave,
Se të vogël më ke ngritur
Prej vëndit që kisha lindur.

Nga do kthehem e vërtitem
Me të huaj vetëm piqem
Njeri s’vjen të më pushtonjë,
E zëmrën të m’a gëzojnë.

Kur kujtonj o Mëmëdhenë,
Lotet çurkë mua më venë.
Duar ngre, mi qell vështronj,
Edhe fatin e mallkonj.

Gjer Kur

Sat, 09 Jun 2018 00:00:00 +0000

Gjer kur vallë o Naturë
Regullonj’ e Gjithësisë,
Nuk’ e ke ner ment me prurë
Një gëzim dhe Shqipërisë?

Se nga do sytë që kthejmë
E gjer ku ne na vështrojnë,
Në levrim të gjith i gjejmë
Dyke rendur të punojnë.

Mbret mi gjithë është Djelli
Për të ndritur Gjithësinë,
Të lëvisnjë ç’ban Dheu, Qielli,
Po përse jo Shqipërinë?

Hëna prapë gjithë natën
Ajo del edhe jep jetë,
Gjithëkujt i nxori datën
Veç Shqipërin’ e la shkretë!

Gjuha Jonë

Sat, 09 Jun 2018 00:00:00 +0000

Gjuha jonë sa e mirë!
Sa e ëmbël, sa e gjrë!
Sa e lehtë, sa e lirë!
Sa e bukur, sa e vlerë!r, sa e vlerë!

Gjuha Shqipe

Sat, 09 Jun 2018 00:00:00 +0000

Kur në sulm hodhën turqit
Hordhitë e pambaruara,
Kështjellat e sintaksës
S’i muar që s’i muar.

Në bedena poemash
Popullore mbetën
Kufoma divanesh e
Kufoma bejtesh.

Kur panë se gjuhës
S’i hodhën dot prangat,
Lëshuan drejt saj
Gjithfarë merimangash.

Parashtesa e pjesëza
E lidhëza së prapthi,
Të bukurën gjuhë
Ta bënin lesharapi.

Në përçartje ta kthenin,
Në delir, në jerm.
Ishin vite të rënda,
Ishin shekuj plot helm.

Të të bënin ty, donin
Shqipëri, memece.
Po ja, erdhi Naimi
Si yll mbi ty ecte.

I Burgosuri

Sat, 09 Jun 2018 00:00:00 +0000

O Zot i madh që në qell rri,
Përse më kreve mi dhet njeri?
Sa vuanjë unë nukë vështron?
Të shtrëmbrën, Zot, qysh e duron?

Mbyllur i mjeri nat edhe ditë
Në errësirë, edhe pa dritë,
Dielli as hëna nukë më vështronjë,
Përveç se muret që më rrethojnë.

Nga afërija më kanë ndarë,
Sytë së qari më janë tharë,
Për një të drejtë që ti e di.
Kur kreve botën, o Perëndi.

Lamtumirë

Sat, 09 Jun 2018 00:00:00 +0000

Lamtumirë, ju lë shëndenë,
Ardhi dita që të shkonj,
Për liri për mëmëdhenë
Me gaz vete të lëftonj.

Për lirinë, për lirinë
Me gëzim kam un’ me vdekur
Më s’duronj dot robërinë
Se mjaft zemra m’është djegur

Pushka m’është mëm’ e dashur
Edhe shpata e shkëlqyer
Ati im këto ka pasur
Me gjak t’armikur lyer.

Shtëpi kam gunën e dhirtë,
Malet pyjet ku jetonj
Duke pritur mot e ditë
Armikun ta copëtonj

Lumtësija

Sat, 09 Jun 2018 00:00:00 +0000

Lumtësinë, lumtësinë
Të kësaj bote pa funt
Veç të marrët q’e arrinë
Ata vetëm, ata munt.

Çdo njeri gjer mos marrohet
Ç’nuku bën e kapërxen?
Po më kot lodhet mundohet
Se atë kurrë s’e gjen.

Qoftë mbret, qoftë i fundit,
Gjyrmojnë nga një qëllim,
Po ësht’ ëndër si i gjumit
Fluturon e s’ka qëndrim.

Ajy është i gënjyer
Që pandeh se e afron,
Edhe pret ditën e vyer,
S’di q’e pritmja e mërgon.

Lutje

Sat, 09 Jun 2018 00:00:00 +0000

Qyqe qyqe, bukuroshe,
Që shëtit qoshe mi qoshe
Kur të vesh edhe sivjet,
Çoh të fala me shëndet.

Qoj të fala Shqipërisë
Nga një bir i aratisë.
Edhe thuaj, që në rronjë,
Për ty vetëm dëshëronj.

Dëshëronj ditë e natë,
Se atë kam mëm’ e atë;
Tek ajo qan zemra ime
Se më riti me thërime.

Atje njojta dashurinë
Edhe shkojtja foshnjërinë,
Atje kam gjyshritë t’im,
Që derdh lotë pa pushim.

Në Pyll Do Vete

Sat, 09 Jun 2018 00:00:00 +0000

Në pyje do vete të kre kalive
Me vetësinë atje të shkonj,
Se në kët’ jetë veç hidhërime
Tjatër gjësendi nuk kupëtonj.

Hidhërime s’dinja i vogël sa isha
Losnja këndonja si brumbullak,
Njëzet e një akoma s’kisha
Fytyrën time s’ndonjë pej plak.

S’atë që desha në këtë jetë,
Emrin të saj nuk’e thom dot'
I mbylli sytë, më la të shkretë,
Thëres, kërkonj, po është kot.

Në pyll do vete të kre kalive
Tjatër gjësendi më s’do të pres,
Atje të qanj helmet e mija,
Gjer sa të vinjë ora të vdes.

Për Mëmëdhenë

Sat, 09 Jun 2018 00:00:00 +0000

(Kënga e kryengritësve shqiptarë)

Për mëmëdhenë, për mëmëdhenë
Vraponi burra, se s’ka me prit!
Të vdesim sot ne me besa besë
Pranë flamurit të kuq q’ungrit!

Pranë flamurit, pranë flamurit!
Me shpatë çveshur shqiëtarisht,
Për dhen’ e Babës edhe të Burrit
Kemi me vdekur sot burrërisht.

Tym edhe flakë, ujë të valë
Baba Tomorri nxjerr e buçet,
Të gjithë trimat atje me dalë,
Se dita erdhi koha më s’pret!

E Drini plaku me oshëtima
Mbi Shqipërinë valët po derdh;
Tosk’ edhe Gegë, si vetëtima
Armikut bini se dita erdh;

Uratë për Liri

Sat, 09 Jun 2018 00:00:00 +0000

“Merr uratën, bir, prej meje
edhe armët i gatit,
se erdh dita e shënuar,
dolli ylli e na ndrit.

është ylli i lirisë,
me të tjerë nuku ngjet,
Shqipëria kaqë shumë
këtë yll që po e pret.

Djemt e saj le ta dëftejnë,
kush mban emër shqipëtar,
kurrë s’ka për të duruar
ta urdhnonjë një barbar.

Vdekje djema të kërkoni
për të shënjtënë liri,
rrojtjenë përse e doni
nën zgjedh’ e robëri?

Vallja Shqiptare

Sat, 09 Jun 2018 00:00:00 +0000

Tri herë opinga rrahu dheun
Sikur kërkoi leje prej tij.
Pastaj shamia palët ndehu
Me qeësi dhe madhështi.

Kështu midis qiellit edhe botës
Vallja u lind, vallja u shpall.
Këmba sinjale i çon tokës
Dhe dora qiellit i jep lajm.

Dhe vallja rookulliset tutje
Në kohëra hedhur si hobe,
Prilli përsipër i hedh lule,
Dhjetori borën shkund atje.
n shkund atje.